GUDDIGA DUGSIGA EE MPS

In ka badan labaatan sano, waxaan shaqadayda u huray waxbarashada dadweynaha iyo taageerada ardayda. Kahor inta aan noqon Guddoomiyaha Guddiga Waxbarashada ee MPS, waxaan ardayda iyo qoysaska si toos ah kula shaqeeyay fasallada, barnaamijyada taageera habdhaqanka, iyo doorarka adeegyada ardayga guud ahaan Minnesota.

Waxbarashada kuma soo galin siyaasad. Waxaan u soo galay shaqadan sababtoo ah waxaan aaminsanahay in arday kasta uu mudan yahay dad qaangaar ah oo u dooda, taageera, isla markaana diida inay ka quustaan.

Anigoo ah macallin waxbarashada gaarka ah oo aasaasi ahaan la shaqaynaya ardayda qaadata adeegyada Cillada Shucuurta iyo Habdhaqanka (EBD) iyo Cillada Khalkhalka Ootisamka (ASD), waxaan waayahayga shaqo ku qaatay caawinta dhallinyarada si ay u wajahaan caqabadaha anigoo isla markaana u dhisaya nidaamyo ay ku heli karaan taageero. Waayo-aragnimadaasi waxay sii wadaa inay qaabayso sida aan wax u hoggaamiyo anigoo ah Guddoomiyaha Guddiga.

Waxaan u tartamayaa in dib la iidoorto sababtoo ah Minneapolis waxay maraysaa marxalad muhiim ah. Waxaan bilownay shaqo adag balse lagama maarmaan u ah in degmadeena loo beddelo mid leh xasillooni dhaqaale, iyadoo isla markaana la xaqiijinayo in arday kasta—iyadoon loo eegin xaafadooda—uu helo waxbarasho dawladeed oo tayo sare leh. Waxaan aaminsanahay inaan u baahannahay hoggaan khibrad leh, oo deggan oo shaqadaas ku sii wada isla xisaabtan, wada-shaqeyn, iyo aragti cad oo mustaqbalka ah.

Waxay ii ahayd sharaf inaan u adeego ardayda, qoysaska, iyo barayaasha Minneapolis, waxaana sharaf u arki lahaa inaan sii wado u adeegista bulshadeenna.

Waxaan aaminsanahay in go’aamada loo gaaro iyadoo loo dhawaanayo ardayda ilaa inti macquul ah iyadoo la raacayo aragti midaysan oo degmada oo dhan ah. Dugsiyada waxay horayba ugu naaloon jireen madax-bannaani wayn iyagoo u maraya Golahooda Rugta iyo Kooxahooda Hoggaanka Waxbarista iyagoo diyaariya qorshayaal horumarinta dugsiga ah oo ka tarjumaya baahiyaha gaarka ah ee ardaydooda iyo xaafadahooda.

Isla markaana, masuuliyadda Guddiga waa inuu xaqiijiyo in arday kasta uu helo khibrad waxbarasho oo tayo sare leh, isla markaana joogta ah. Dugsiyadu waa inay lahaadaan dabacsanaan ay ku daboolaan baahiyaha maxalliga ah, laakiin ma jirto ilmo ay tahay inuu helo waxbarasho si weyn uga duwan tan kale kaliya sabab ah dugsiga uu dhigto. Isku dheellitirka saxda ah ayaa awood-siinaya madaxda dugsiyada iyadoo isla markaana la joogtaynayo filashooyinka degmada oo dhan ah ee kor u qaadaya sinnaanta, joogtaynta, iyo isla xisaabtanka.

Kordhinta isdiiwaangelinta waa qayb ka mid ah xalka—balse ma noqon karto halka xal oo kaliya. Waalidiintu dugsiyada kuma doortaan xayaysiin darteed; dugsiyada waxay ku doortaan maadaama ay aaminsan yihiin waayo-aragnimada ay carruurtooda yeelan doonaan.

Shaqadeenna isbeddelka waxay garowsan tahay in kordhinta diiwaangelinta iyo hagaajinta khibradda ardayga ay isla socdaan. Guddiga wuxuu faray maamulka inuu diyaariyo istiraatiijiyado oo aan ahayn kaliya in lagu soo jiito arday cusub balse sidoo kale lagu sii haysto qoysaska horayba u doortay MPS. Taasi waxaa ka mid ah xoojinta dariiqyada lagu galo waxbarashada carruurnimada hore iyadoo laga qaybgelinayo qoysaska Pre-K iyo Kindergarten, hagaajinta khibradaha u gudbidda dugsiga dhexe, iyo xaqiijinta inay ardaydu helaan khibrad waxbarasho oo tayo sare leh laga bilaabo maalinta ay is-diiwaangeliyaan ilaa ay ka qalin-jebiyaan.

Isla markaana, waa inaan gaarnaa go’aamo maaliyadeed oo masuuliyad leh iyadoo lagu salaynayo diiwaangelinta maanta—oo aan lagu salayn diiwaangelinta aan rajaynayno shan sano oo hadda kadib ah. Dhisidda kalsooni muddo dheer ah oo lala yeesho qoysaska waxay u baahan tahay labadaba waxbarasho heer sare ah iyo xasillooni maaliyadeed.

Dhageysigu waa mid ka mid ah masuuliyadaha ugu muhiimsan ee Guddiga—balse dhageysigu marwalba kama dhigna ku raacitaan. Qof kasta wuxuu mudan yahay in la maqlo, oo go’aamada Guddiga waa inay ahaadaan kuwo daah-furan laguna saleeyo danaha ugu wanaagsan ee ardayda.

Inta aan sii wadno gaarista go’aamo adag, xubnaha Guddiga waa inay si taxadar leh u miisaamaan aragtiyaha waalidiinta, macallimiinta, ardayda, iyo xubnaha bulshada. Ugu dambayntii, waxay masuuliyad inaga saaran tahay dhammaan 28,000 arday ee dhigata Dugsiyada Dadweynaha ee Minneapolis—kaliya nagama saarna codadka ugu qaylada dheer qolka. Hoggaan wax ku ool ah micnaheedu waxay ka dhigan tahay dhageysiga qof kasta iyadoo isla markaana la gaarayo go’aamo ka shaqeeya guusha muddada fog ee arday kasta.

Akhrisku waa aasaaska wax kasta oo kale oo aan ka codsanno ardayda inay sameeyaan. Labadi sano ee la soo dhaafay, Dugsiyada Dadweynaha ee Minneapolis waxay hirgelinayeen Aqoonta Akhriska iyagoo u maraya Xeerka READ, iyadoo xogti dhawaan ay muujinayso in 86% ka mid ah macallimiinta ay dhammeystireen tababarkoodi loo baahnaa ayna dhaqamadaan waxbaridda ah ee caddaynta ku salaysan ku dabaqayaan fasallada.

Wax ka qabashada hore waa lagama maarmaan. Waxaan mudnaan siinay tiro arday fasal oo la maareyn karo anagoo u marayna heshiisyada shaqaalaha waxaana ballaarinaynaa fardambe bartilmaameed ah oo qiyaas sare leh oo loogu talagalay ardayda u baahan taageero dheeraad ah. Iyadoo xogta koritaanka ardayda ee dhawaan ahayd ay tahay mid dhiirigelin leh, koritaan kaliya kuma filna. Waa inaan sii wadnaa inaan nafteenna kula xisaabtanno kordhinta aqoonta akhriska heer fasal si arday kasta uu u helo fursad uu ku guulaysto.